काठमाडौ। नेपाली पत्रकारहरुको छाता संगठन नेपाल पत्रकार महासंघमा गोविन्द आचार्य अध्यक्षमा निर्वाचित बनेका छन्। नवनिर्वाचित अध्यक्ष आचार्यले महासंघलाई सबैको साझा संस्थाकारुपमा अगाडि बढाउने बताएका छन् ।
महासंघको २५औं महाधिवेशनबाट निर्वाचित भएपछि मंगलबार राजधानीमा आयोजित बधाइ ज्ञापन कार्यक्रममा अध्यक्ष आचार्यले कार्ययोजना बनाएर महासंघ सबैको साझा संस्था हो भन्ने अनुभूति दिलाउने प्रतिबद्धता समेत व्यक्त गरेका छन्।नवनिर्वाचित उपाध्यक्ष विपुल पोखरेलले महासंघलाई सबैको साझा चौतारीकारुपमा लैजान आफूले काम गर्ने बताए। उनले श्रमजीवी पत्रकारका समस्या समाधान गर्न सदैव प्रतिबद्ध रहने धारणा पनि व्यक्त गरे।
महासंघका पूर्वअध्यक्ष डा.सुरेश आचार्य, तारानाथ दाहाल, सल्लाहकार पोषण केसी, नेपाल प्रेस युनियनका अध्यक्ष बद्री सिग्देल, प्रेस सेन्टर नेपालका अध्यक्ष महेश्वर दाहाल, प्रगतिशील पत्रकार संघका अध्यक्ष नारायण शर्मालगायतले महासंघलाई सबैको साझा संस्था बनाएर श्रमजीवी पत्रकारको हक–हितका लागि काम गर्न नवनिर्वाचित कार्यसमितिलाई आग्रह गरे।
सोमबार भएको निर्वाचनको मतपरिणामअनुसार आचार्य ७३२ मत प्राप्त गरी विजयी भएका हुन् भने उनका निकटतम् प्रतिद्वन्द्वी तीर्थ कोइरालाले ६२७ मत प्राप्त गरेका थिए। अन्य पदाधिकारीमा पनि आचार्य नेतृत्वकै प्रेस युनियन, प्रेस सेन्टर र प्रगतिशील पत्रकार संघको संयुक्त समूह विजयी भएको छ भने केही सदस्यमा प्रेस चौतारी नेपाल समूहका प्रतिनिधि विजयी भएका छन्।
कुल एक हजार ५०८ मतदाता रहेको निर्वाचनमा एक हजार ४४९ मत खसेको थियो। निर्वाचित पदाधिकारीमा खुला उपाध्यक्षमा विपुल पोखरेल, समावेशी उपाध्यक्षमा दिलीप थापामगर, महासचिवमा रमेश विष्ट, खुला सचिवमा रामप्रसाद दाहाल, महिला सचिवमा लक्ष्मी पुन, आदिवासी जनजाति सचिवमा उदय जिएम, मधेशी सचिवमा शीतलप्रसाद महतो, दलित सचिवमा रेमबहादुर विश्वकर्मा, एसोसिएट सचिवमा प्रकाश थापा र कोषाध्यक्षमा राजेश मिश्र छन्। यस्तै, लेखा समितिको संयोजकमा रोशन पुरी र लेखा सदस्यमा मीरा राजभण्डारी र भूपेन्द्र आचार्य विजयी भएका छन्।
खुला केन्द्रीय सदस्यमा जन्मदेव जैसी, टेकराज शाही, नकुल अर्याल, लक्ष्मण कार्की र हरिहरसिंह राठौर विजयी भएका छन् । महिला केन्द्रीय सदस्य जानुका बराल, श्वेता सिह्ना र सिर्जना अर्याल, दलित केन्द्रीय सदस्यमा गोपाल बराइली र मधु शाही, उपत्यका केन्द्रीय सदस्यमा गोविन्दप्रसाद चौलागाइँ र लेखनाथ न्यौपाने, आदिवासी जनजाति केन्द्रीय सदस्यमा टेकराज थामी र राजेश चाम्लिङ राई, मधेसी केन्द्रीय सदस्यमा अवधेशकुमार झा र सुरेशकुमार यादव, केन्द्रीय सदस्य अपांगता माधव चम्लागाई, केन्द्रीय सदस्य अल्पसंख्यकमा छेटु शेर्पा, केन्द्रीय सदस्य प्रतिष्ठानमा टीकाराम प्रधान र यम विरही, केन्द्रीय सदस्य एसोसिएटमा पवन आचार्य र राधेश्याम दाहाल विजयी भएका छन् ।
प्रादेशिक केन्द्रीय सदस्यमा प्रदेश नम्बर–१ बाट उद्धव तिम्सिना र सटेन्द्र जवेगु, प्रदेश–२ बाट देवकुमार यादव र शैलेन्द्र झा, प्रदेश नम्बर–३ बाट कृष्ण गिरी र द्धारीका काफ्ले, प्रदेश–४ बाट नवीनराज कुइँकेल र रामकृष्ण ज्ञवाली, प्रदेश नम्बर–५ बाट पुरुषोत्तम सुवेदी र वसन्त गिरी, प्रदेश नम्बर–६ बाट पूर्णप्रसाद चौलागाइँ र कलेन्द्र सेजुवाल र प्रदेश नम्बर–७ बाट मीन बम, उत्तरसिंह विष्ट र श्यामदत्त भट्टले बराबर मत प्राप्त गरेका छन्।
प्रकाशन मिति–२०७४ साल भाद्र ६ गते मंगलवार ।