काठमाडौ। नेपालमा संयुक्त लोकतान्त्रिक मधेसी मोर्चाले सरकारलाई दिएको समर्थन फिर्ता लिएको छ। सप्तरी घटनापछि आकस्मिकरुपमा बसेको संयुक्त लोकतान्त्रिक मधेसी मोर्चाको बैठकले सरकारलाई दिंदै आएको समर्थन फिर्ता लिने निर्णय गरेको छ।
संघीय समाजवादी फोरम नेपालको कार्यालय तीनकुनेमा बसेको बैठकले समर्थन फिर्ता लिने निर्णय गरेको राष्ट्रिय मधेस समाजवादी पार्टीका महासचिव केशव झाले बताएका छन् । मोर्चाले मंगलबार सभामुखलाई पत्र लेखेर समर्थन फिर्ता लिएको औपचारिक जानकारी दिने भएको छ। यस्तै मोर्चाले फागुन २४ र २५ गते मधेस बन्दको घोषणा गरेको छ।
मेची महाकाली अभियान बिथोल्न पुगेका मधेसी मोर्चाका कार्यकर्तामाथि गोली चलाउँदा चार जनाको मृत्यु भएपछि मोर्चाको आकस्मिक बैठक बसेको थियो । पुष्पकमल दाहाल प्रचण्ड नेतृत्वको सरकारलाई मोर्चामा आबद्ध ७ दलको समर्थन थियो। संघीय समाजवादी पार्टीका १५, तराई मधेस लोकतान्त्रि पार्टीका ११, सदभावना पार्टी ५, तराई मधेस सदभावना पार्टी ३, राष्ट्रिय मधेस समाजवादी पार्टी ३, नेपाल सदभावना पार्टी १ र मधेसी जनअधिकार फोरम गणतान्त्रिकका १ सांसदको समर्थन थियो ।
प्रकाशन मिति–२०७३ साल फागुन २३ गते सोमवार ।