काठमाडौ। राप्रपा नेपाल र राप्रपा वीच पार्टी एकता भएको छ। सोमवार दुवै पार्टी वीच एकता भएको छ। एकतापछि दुवै पार्टीको नाम राष्ट्रिय प्रजातन्त्र पार्टी राखिएको छ। झण्डा भने राप्रपा नेपालको कायम गरिएको छ।
पार्टीको कार्यकारी अध्यक्ष कमल थापा र राष्ट्रिय अध्यक्ष पशुपतिशम्शेर राणा छन्। पूर्वप्रधानमन्त्री लोकेन्द्रबहादुर चन्द, विश्वबन्धु थापा र डा. प्रकाशचन्द्र लोहनी वरिष्ठ नेता छन्। प्रज्ञा प्रतिष्ठानमा सोमबार आयोजित पार्टी एकता घोषणा सभामा नेताहरुले अब राप्रपालाई देशको प्रमुख शक्ति बनाउने बताए।
राप्रपा अध्यक्ष कमल थापाले भने, ‘यो एकताले बैकल्पिक मार्गचित्रका साथ एउटा प्रजातान्त्रिक शक्ति खडा भएको छ ।’मुलुकले भरोसा गर्न सक्ने, दुरगामी सोचाई र अनुभव बोकेको पंक्ति पार्टीमा रहेको उनले बताए। आरोह अवरोहका क्रममा केही ओझेलमा परेको भएपनि अब नयाँ शक्तिको उदय भएको र जनतामा भरोसा जागेको उनले दाबी गरे।
राष्ट्रिय अध्यक्ष पशुपति शम्शेर राणाले हिन्दु राष्ट्र स्थापनाका लागि राप्रपाले नेतृत्वदायी भूमिका गर्ने बताए। नेपाल धर्मनिरपेक्ष हुन नसक्ने भन्दै उनले भने, ‘म चुनौती दिन चाहन्छु, सक्छौं भने जनमत संग्रह गरेर जनमत संग्रह गर।’
प्रकाशन मिति–२०७३ साल मंसीर ७ गते मंगलवार ।