काठमाडौ । नेपाली साहित्य विकास परिषद यूकेका वरिष्ठ सह–अध्यक्ष कवि कोमलप्रसाद श्रेष्ठ मल्लको कविता संग्रह ‘म के लेखुं ?’ शुक्रबार सार्वजनिक भएको छ। नेपाल प्रज्ञा–प्रतिष्ठानको सभाकक्ष कमलादी काठमाडौमा उक्त कृति लोकार्पण गरिएको हो।
कार्यक्रममा नेपाल प्रज्ञा प्रतिष्ठानका कुलपति गंगाप्रसाद उप्रेती, उपकुलपति डा. विष्णुबिभु घिमिरे, प्राज्ञ डा.ज्ञानु पाण्डे, वरिष्ठ कवि गोपाल पराजुली, प्राज्ञ वियोगी बुढाथोकी, युवा समालोचक महेश पौडेल, शक्ति प्रसाद श्रेष्ठ, महेन्द्रप्रसाद श्रेष्ठ, मुक्तिनारायण श्रेष्ठ, शिव कुमार श्रेष्ठ लगायतले कृति लोकार्पण गरेका थिए।
लोकार्पण समारोहमा नेपाल प्रज्ञा–प्रतिष्ठानका कुलपति प्रमुख अतिथि गंगाप्रसाद उप्रेतीले प्रवासमा आफ्नो व्यस्त जीवनबाट सिर्जनालाई समय र ठाउं दिनु प्रशंसनीय कार्य भएको बताए। उप्रेतीले बेलायतमा रहेका साहित्यकारहरुबाट उत्कृष्ट कृतिहरू प्रकाशित भइरहेको भन्दै खुशी व्यक्त गरे । बेलायत र नेपालमा खुलेका साहित्यिक संस्थाहरुबाट दुई देशका साहित्यकारबीच साहित्यिक अनुभव आदानप्रदान, सहकार्य र अन्तरक्रिया हुनु नेपाली साहित्य विकासका लागि महत्वपूर्ण भएको उप्रेतीको भनाई रहेको छ।
उक्त अवसरमा नेपाली साहित्य विकास परिषद नेपाल च्याप्टरकी अध्यक्ष इल्या भट्टराईले कवि मल्लको कृति लोकार्पण कार्यक्रमलाई एउटा अवसरको रुपमा लिइएको जनाइन् । विमोचित संग्रहमाथि समालोचक प्राध्यापक महेश पौडेलले समीक्षा गर्दै ‘म के लेखु ?’ कविता संग्रहले भाव र भूमिबाट संवेदनशील अर्थ बोकेको चर्चा गरे।
बेलायतमा रहने कवि कोमलको कृतिबाट नेपालको आवाज प्रस्फुटन भएको पौडेलले बताए । मन्तव्यका क्रममा कवि गोपाल पराजुलीले कोमलको कविता संग्रह न्यायाधीशको फैसला, देशभक्तको प्रतिवेदन र आंसु कविको निवेदन हो भने।
कवि कोमल मल्लले आफ्नो कवि जीवनको पृष्ठभूमि प्रस्तुत गरेका थिए भने प्राज्ञ डा. ज्ञानु पाण्डे, शक्तिप्रसाद श्रेष्ठ, हरिशरण लामिछाने, डा. रेणुका थापा आदिले कोमललाई वधाइ तथा शुभकामना दिएका थिए।
प्रकाशन मिति–२०७४ साल बैशाख ३० गते शनिवार ।