प्रधानमन्त्री केपी शर्मा ओली चीनको बेइजिङ्गमा

0
1610

KP Oli in Chinaबेइजिङ्ग। प्रधानमन्त्री केपी शर्मा ओली चीनको साताव्यापी भ्रमणका क्रममा चीनको राजधानी बेइजिङ्ग पुगेका छन्। प्रधानमन्त्री ओली चीनका प्रधानमन्त्री लि खछयाङको निमन्त्रणामा चैत १४ गतेसम्म हुने भ्रमणका क्रममा बेइजिङ पुगेका हुन्। उनलाई बेइजिङ अन्तर्राष्ट्रिय विमानस्थलमा चीनका विदेश मन्त्रालयका उपमन्त्री लीउ जेन मिन, चीनका लागि नेपाली राजदूत डा महेशकुमार मास्के, परराष्ट्र मन्त्रालय तथा दूतावासका उच्चपदस्थ अधिकारीले स्वागत गरेका थिए। प्रधानमन्त्री ओली काठमाडौँबाट बिहान ११ बजे चीनका लागि प्रस्थान गरी पाँच घण्टाको उडानपछि स्थानीय समयअनुसार साँझ ६ः२० मिनेटमा बेइजिङ पुगेका हुन्।

प्रधानमन्त्री ओलीलगायतको नेपाली भ्रमण टोली हिमालय एअरलाइन्सको विमानबाट बेइजिङ आइपुगेको हो। प्रधानमन्त्रीका साथ उनकी धर्मपत्नी राधिका शाक्य, उपप्रधानमन्त्री तथा परराष्ट्र मन्त्री कमल थापा, अर्थमन्त्री विष्णुप्रसाद पौडेल, शिक्षा मन्त्री गिरिराजमणि पोखरेल, वाणिज्यमन्त्री दीपक बोहरा, प्रधानमन्त्रीका राजनीतिक सल्लाहकार विष्णु रिमाल, सांसद, व्यापारिक समुदाय, सञ्चारकर्मीलगायत पनि बेइजिङ पुगेका छन्।

प्रधानमन्त्री ओली आइतबार साँझ राजधानी बेइजिङस्थित डिआओयुताइ स्टेट गेष्ट हाउसमा बस्नेछन् । प्रधानमन्त्री ओलीले भोलि चिनियाँ राष्ट्रपति सि जिन पिङसँग भेटघाट गर्ने कार्यक्रम छ। भोलि नै ग्रेट हल अफ दि पिपुलमा नेपाल–चीन वार्ता हुने र केही महत्वपूर्ण सम्झौतामा हस्ताक्षर हुने कार्यक्रम छ । (रासस)

प्रकाशन मिति–२०७२ साल चैत्र ७ गते आइतवार ।