फरार रेशम चौधरीको रिट दर्ता गर्न सर्वोच्च अदालतवाट अस्वीकार

0
1429

काठमाडौ। फरार रहेकै अवस्थामा कैलाली क्षेत्र नम्बर–१ बाट प्रतिनिधिसभा सदस्यमा विजयी रेशम चौधरीको सर्वोच्च अदालतले रिट दर्ता गर्न अस्वीकार गरेको छ।

कैलालीको टीकापुर घटनाका मुख्य अभियुक्त ठहर भइ फरार रहेकै अवस्थामा राष्ट्रिय जनता पार्टी नेपालबाट प्रतिनिधिसभा सदस्य निर्वाचनमा विजयी चौधरी निर्वाचन अधिकृतले वारेसमार्फत् विजयी भएको प्रमाणपत्र नदिएपछि अदालत पुगेका थिए। सर्वोच्च अदालतका मुख्य रजिष्ट्रार नहकुल सुवेदीले दर्ता गर्न नमिल्ने (दरपीठ) गरेको आदेशमा ‘कर्तव्य ज्यान मुद्दामा अदालतबाट ‘वारेन्ट नोटिस’ जारी भएको व्यक्तिले वारेसबाट प्रमाणपत्र लिन पाउनुपर्ने भन्दै दर्ता हुन आएको मुद्दा सुनुवाइ गर्न नसकिने’ उल्लेख छ।

Mr. Resam Lal Chaudhary

चौधरीले फरार अवस्थामा वारेसनामार्फत् उम्मेदवारी दिएर निर्वाचन जितेपछि चौधरी पत्नी रञ्जिता श्रेष्ठ चौधरीलाई वारेस दिँदै प्रमाणपत्र लिन पठाएको र जिल्ला निर्वाचन कार्यालयले आफैं उपस्थित हुनुपर्ने भन्दै प्रमाणपत्र दिन अस्वीकार गरेको थियो। विजयको प्रमाणपत्र नपाएपछि चौधरीले वारेसमार्फत् दर्ता गर्न ल्याएको रिट निवेदन दर्ता गर्न अस्वीकार गरिएको हो।

‘कर्तव्य ज्यान, ज्यान मार्ने उद्योगलगायतमा अदालतमा मुद्दा विचाराधीन रहेको र उक्त मुद्दालाई स्वीकार गरी अदालतमा उपस्थितसमेत नभएको व्यक्तिको हकमा सर्वोच्चमा निवेदन दर्ता गर्न मिल्ने देखिँदैन’–दरपीठ आदेशमा भनिएको छ। टीकापुरमा २०७२ भदौ २७ मा थरुहट आन्दोलनकाक्रममा नेपाल प्रहरीका वरिष्ठ प्रहरी उपरीक्षक लक्ष्मण न्यौपानेसहित सात सुरक्षाकर्मी र एक बालकको ज्यान गएको थियो।
प्रकाशन मिति–२०७४ साल मंसीर २९ गते शुक्रबार ।