मुलुकको मुक्तिका लागि मरेर शहीद बन्ने महान शहीदको संझनामा शहीद दिवस

0
3031

काठमाडौ। मुलुकलाई जहानिया राणा शासनवाट मुक्त बनाउन चट्टान जस्तै कठोर मन बनाएर राणा शासनको तातो गोली हाँसी–हाँसी खाएर तथा फासी लगाएर परमवीर बनेका ती महान शहीदको संझनामा आज माघ १६ अर्थात् शहीद दिवस । नेपाल तथा विदेशमा विभिन्न कार्यक्रम गरी शहीद दिवस मनाउने कार्य भएको छ।


देश र जनताको हित र अधिकारका लागि जीवन त्याग गर्ने शहीदप्रति सम्झना र सम्मान प्रकट गर्दै हरेक बर्षको माघ १६ गते यो दिवस मनाइने गरिन्छ । नेपाली जनतालाई सार्वभौमसत्ता सम्पन्न नागरिक बनाउन जहानियाँ राणा शासन, निरंकुश पञ्चायती व्यवस्था तथा राजतन्त्रविरुद्ध प्रजातान्त्रिक क्रान्ति एवं लोकतान्त्रिक आन्दोलनमा आफ्नो जीवनको आहूती गरेका वीर सपूतको सम्झनामा प्रत्येक वर्ष शहीद दिवस मनाउने गरिन्छ।

अमर शहीद शुक्रराज शास्त्री, धर्मभक्त माथेमा, दशरथ चन्द र गंगालाल श्रेष्ठको संघर्षमय जीवन र बलिदानको गाथा एवं प्रजातान्त्रिक आन्दोलनका अरू योद्धाको योगदानको सम्झनामा यो दिवस मनाइने गरिएको हो। हरेक वर्ष माघ १० देखि १६ गतेसम्म ‘शहीद सप्ताह’ मनाउने गरिन्छ।

विसं.१९९७ साल माघ १० गते निरंकुश राणा शासनविरुद्ध नेपाल प्रजापरिषद् स्थापना गरी जनतालाई आफ्नो हक र अधिकारका लागि क्रान्ति गर्न प्रेरित गर्ने शुक्रराज शास्त्रीलाई टेकुस्थित खरीको रूखमा झुन्डयाएर हत्या गरिएको थियो । यसैगरी माघ १३ गते सिफलमा धर्मभक्त माथेमालाई झुन्ड्याइएको थियो भने माघ १५ गते दशरथ चन्द र गंगालाल श्रेष्ठलाई शोभा भगवतीमा गोली हानी हत्या गरिएको थियो।

प्रकाशन मिति–२०७४ साल माघ १६ गते मंगलवार ।