काठमाडौ । नेपाल विद्युत् प्राधिकरणले अर्को सातादेखि भारतबाट थप ९० मेगावाट बिजुली आयात गर्ने भएको छ । नेपाल–भारतबीच ढल्केबर–मुजफ्फरपुर अन्तरदेशीय प्रसारण लाइनको निर्माण सकिन लागेकाले त्यसैबाट थप ९० मेगावाट आयात गर्न लागिएको हो । ९० मेगावाट थपिएपछि मुलुकमा लोडसेडिङ दुई घण्टा घट्ने प्राधिकरणका अधिकारीले बताए । अहिले दैनिक १५ घण्टासम्म लोडसेडिङ छ।
ढल्केबर–मुजफ्फरपुर अन्तरदेशीय प्रसारण लाइन निर्माणको काम यसै साता सम्पन्न हुँदैछ । हाल प्राधिकरणले भारतबाट २ सय ३५ मेगावाटको हाराहारीमा बिजुली आयात गरिरहेको छ । ९० मेगावाट थपिएपछि भारतबाट आयात हुने बिजुली ३ सय २५ मेगावाट पुग्नेछ, जुन हिउँदयाममा मुलुकभरका विद्युत् आयोजनाहरूबाट उत्पादन हुने कुल बिजुलीको हाराहारी हो । अन्तरदेशीय प्रसारण लाइन जनवरी पहिलो सातामै सकेर विद्युत् आयात गर्ने लक्ष्य राखिएको भए पनि मधेस आन्दोलन र बन्दका कारण केही ढिलाइ भएको हो ।
अन्तरदेशीय प्रसारण लाइनबाट बिजुली ल्याउन ढल्केबरमा १ सय एमभीए क्षमताको ट्रान्सफर्मर जडान गर्ने कामसमेत अन्तिम चरणमा पुगेको छ । प्रसारण लाइन पूर्ण क्षमतामा सञ्चालन भएपछि भने भारतबाट १ सय ५० मेगावाट बिजुली आयात गरिनेछ । प्राधिकरणले घोषित समयभन्दा बढी लोडसेडिङ गर्न थालेको छ । दिनको ८ देखि १५ घण्टासम्म लोडसेडिङ गर्दै आएको भनिए पनि तालिकामा तोकिएभन्दा आधा घण्टा पहिल्यै बिजुली जाने र आधा घण्टा ढिलो आउन थालेको छ ।
प्राधिकरणको यो अघोषित लोडसेडिङका कारण ग्यास अभावमा विद्युतीय चुलो, राइस कुकर, हिटरलगायत इलेक्ट्रिक सामान प्रयोग गर्दै आएका उपभोक्ता थप मारमा परेका छन् । प्राधिकरणले भने एकैचोटि लोड (बिजुली) छाडदा ट्रान्सफर्मर पडकिने समस्या बढ्न थालेपछि प्राविधिक कारणले केही समय अघोषित लोडसेडिङ हुन पुगेको दाबी गरेको छ।
प्रकाशन मिति–२०७२ साल माघ १५ गते शुक्रबार ।