काठमाडौ। भारतलाई १ सय ८० रनले पराजित गर्दै पाकिस्तानले पहिलो पटक च्याम्पियन्स ट्रफी क्रिकेटको उपाधि जितेको छ। आइतवार आयोजित खेलमा पाकिस्तानले दिएको ३ सय ३९ रनको लक्ष्य पछ्याउने क्रममा भारत ३० दशमलव ३ ओभरमा १ सय ५८ रनमै समेटियो।

यो जितसँगै पाकिस्तानले २५ वर्षपछि आइसिसीको महत्वपूर्ण उपाधि जितेको छ । सन् १९९२ मा इमरान खानको कप्तानीमा एक दिवसीय विश्वकपको उपाधि जिते यता पाकिस्तानले आइसीसीको ५० ओभरको कुनै पनि प्रतियोगिता जितेको थिएन। इङ्ल्यान्डको लण्डनस्थित द ओभलमा टस हारेर पहिले व्याटिङ गरेको पाकिस्तानले शानदार ब्याटिङ गर्‍यो।

भारत विरुद्ध पहिलो एक दिवसीय खेल खेलेका फाखर जमानले १ सय १४ रन बनाएपछि पाकिस्तानले ५० ओभरमा ४ विकेट गुमाएर ३ सय ३८ रन बनायो। उसका लागि अजहर अलीले ५९ रन, मोहोमद हफिजले अविजित ५७ रन तथा बाबकर आजमले ४६ रन बनाए। जवाफमा ३ सय ३९ रनको विशाल लक्ष्य पछ्याएको भारतले ३१ औं ओभरमा अल आउट हुनुपुर्व १ सय ५८ रन मात्रै बनाउन सक्यो । भारतका लागि हार्दिक पाण्डेले सर्वाधिक ७६ रन बनाए।

बलिङतर्फ पाकिस्तानका मोहोमद आमिर र हसन अलीले ३र३ विकेट लिए ।
आमिर टप अर्डरका ब्याट्सम्यानहरु रोहित शर्मा, विराट कोहली र शिखर धवनलाई पभेलियन फर्काउँदै पाकिस्तानलाई जितको बाटोमा लगेका हुन् ।
प्रकाशन मिति–२०७४ साल असार ५ गते सोमवार ।