काठमाडौ। नेपालभाषामा निर्माण भएका चलचित्रहरुको संवद्र्धन र प्रवद्र्धनको लागि बर्षभरि नेपालभाषा फिल्म महोत्सव हुने भएको छ। नेपालभाषा संकिपा समाजको आयोजनामा आगामी पुष महिनाको अन्तिम साताबाट काठमाडौको बागबजार स्थित सिटी म्याक्स सिनेमा हलमा हुनेभएको छ।
हरेक महिनाको अन्तिम हप्ता नेपालभाषामा निर्माण भएको छनौटमा परेका १२ चलचित्र मध्ये एक चलचित्रलाई दिनभर प्रदर्शन गरिने भएको छ।
महिनाको एक चलचित्र गरेर १२ महिनामा १२ चलचित्र महोत्सवमा प्रदर्शन गरिने जानकारी नेपालभाषा संकिपा समाजका महासचिव स्वतन्त्र महर्जनले बताएका छन्। त्यसरी प्रदर्शनमा परेका चलचित्रलाई कम्तिमा आयोजकको तर्फवाट नगद १० हजार तथा बढीमा २५ हजार प्रदान गरिने पनि महासचिव महर्जनले भनेका छन्।
नेपालभाषामा निर्माण भएका हालसम्म रिलिज नभएका, च्यारिटी–शो पनि नगरिएका र सीडी–डीभीडीमा ननिकालिएका चलचित्रलाई विशेष प्राथमिकताकासाथ छनौट गरेर आयोजक नेपालभाषा संकिपा समाज लागिपरेको समाजका उपाध्यक्ष पवन जोशीले बताए। त्यसका लागि एक समितिले हाल कार्य भैरहेको र केहीदिन पश्चात नै कुन महिना कुन चलचित्र महोत्सवमा प्रदर्शन गरिने संपूर्ण जानकारी नै आउने उपाध्यक्ष जोशीले भनेका छन्।
नेपालभाषामा ठूलो पर्दाको चलचित्र सिलूको निर्माणबाट इतिहास रचिएको र त्यसपछि निर्माण भएका ठूला तथा साना नेपालभाषाका चलचित्रहरुको संख्या एक सय भन्दा नाँघिसकेको समाजका अध्यक्ष सुरेन्द्र तुलाधर भन्छन्। नेपालभाषाका शिर्षस्थ चलचित्र पत्रकार विजयरत्न तुलाधरले यसअघि केलटोलको आयोजनामा नेपालभाषा संकिपा नखः नामबाट साताव्यापी चलचित्र प्रदर्शन गर्ने कार्य गर्दैआएकोमा यो महोत्सव बृहत नै हुने आफूले अपेक्षा गरेको टिप्पणी गरे।
नेपालभाषा संकिपा समाज स्थापना भएको यो बर्षबाट तेश्रोबर्ष पूरा भएर चौथो बर्षमा प्रवेश गरेको छ। चौथो बर्षमा प्रवेश गरेको उपलक्ष्यमा समाजले एक बर्ष नेपालभाषा फिल्म महोत्सवको आयोजना गरिन लागेको समाजले जनाएको छ।
पहिलोपल्ट बृहत रुपमा हुन गैरहेको नेपालभाषा फिल्म महोत्सवले नेपालभाषाका चलचित्रको उत्थान गर्ने कुरामा नेपालभाषाका चलचित्रकर्मीहरु निक्कै उत्साहित बनेको पाइएको छ। विलकुलै नयाँ चलचित्र तथा कतै प्रदर्शनमा नआएको र सीडी तथा भीसीडीमा ननिकालेका चलचित्रलाई विशेष प्राथमिकता दिइने स्पष्ट प्रावधान राखिएतापनि चलेका चलचित्रहरुले समेत महोत्सवका लागि आवेदन दिइएको पाइएको छ।
आयोजक नेपालभाषा संकिपा समाजले सकभर नयाँ चलचित्रलाई नै प्राथमिकता दिइने भएतापनि आवश्यक १२ वटा चलचित्र प्रावधान अनुसार नपाएमा र नपुगेमा मात्र पुराना चलचित्रलाई प्राथमिकता दिइने भनेको छ।
यही मंसिर १८ गतेसम्म आवेदन गर्ने समय थप गरिएको नेपालभाषा संकिपा समाजका उपाध्यक्ष पवन जोशीले बताए। उपाध्यक्ष जोशीका अनुसार हालसम्म तिनतिकःमहाविकः, थम्ह म्हूगु गाः, पानवती, बाला–मयजु, मनु म्हसिकी,थ्वला ग्यानापु स्टाइल, तापलाय्, अंस, ताना ज्यूः, नामक चलचित्रहरुले आवेदन गरिसकेका छन्। आवेदन दिने चलचित्रहरुको लर्को नै लाग्ने संभावना बढी नै देखिएकोले अन्तिम नामावाली मंसिर १९ गते मात्र जनसमक्ष आउने बताइएको छ।
नेपालभाषाका फिल्म महोत्सवमा समावेश हुने चलचित्रले महिनाभर नै भव्य रुपमा प्रचार तथा प्रसार पाउनुको अलावा महोत्सवमा प्रदर्शित चलचित्रले नगद १० हजार देखि २५ हजारसम्म पाउने नयाँ सोचले नेपालभाषाका चलचित्र निर्माणमा लागेका चलचित्रकर्मीहरु थप ऊर्जा प्रदान गरेको छ। यो अवसरलाई महोत्सवको रुपमा लिने पक्षमा नेपालभाषाका चलचित्रकर्मीहरु वीच होडबाजी जस्तो नै हुने देखिएको छ। स्वस्थ प्रतिस्पर्धाले नेपालभाषाका चलचित्रको विकासमा थप टेवा पुग्ने महोत्सव आयोजकहरुको अपेक्षा रहेको छ।
