काठमाडौं। आज फेब्रुअरी १४ तारिख भ्यालेन्टाइन डे अर्थात् प्रेम दिवस ! विश्वभरका मायालु जोडीहरु आज प्रेम दिवस अर्थात भ्यालेन्टाइन–डे मनाइरहेका छन्। आजका दिन विशेष गरी युवा युवतीले यसलाई विशेष चाडकै रुपमा मनाउने गरेका छन्।
युवाहरु मात्र होइन, बयस्कहरु लगायत सवैले विशेष पर्वकै रुपमा मनाउने कार्य गरेका छन्। ललितपुर महानगरपालिका वडा नंबर ५ का वडा अध्यक्ष विकासमान श्रेष्ठले पनि भ्यालेन्टाइन–डेमा आफ्नो भ्यालेन्टाइन अर्थात जीवन संगीनी मञ्जु श्रेष्ठलाई विहानै गुलाफको फूल दिएर भ्यालेन्टाइन–डे मनाएर वडाको काममा लागेको वताएका छन्। वडावासी सवैलाई ह्याप्पी भ्यालेन्टाइन भन्न पनि चुकेका छैनन्।
त्यस्तैगरेर, गोकर्णेश्वर नगरपालिकाका नेपाली कांग्रेसका युवा नेता लाक्स श्रेष्ठले पनि भ्यालेन्टाइन–डेका अवसरमा विहानै उदयपुरको कटारीमा रहेकी जीवन संगीनी आँचल श्रेष्ठ र छोरी अन्बी श्रेष्ठलाई आई लब यु भनेर भ्यालेन्टाइनको शुभेच्छा प्रकट गरेका छन्। यसरी नै सवैले एक अर्का मायालुहरुलाई भ्यालेन्टाइन–डेको शुभेच्छा आदान–प्रदान गर्ने कार्य भैरहेको छ। भ्यालेन्टाइन डे को शुरुवात सन् २६९ बाट रोमनबाट भएको मानिन्छ।
यो दिवससँग एउटा दुःखान्त प्रेम कथा जोडिएको छ। तत्कालीन रोमन सम्राट क्लाउडियस द्वितीयले आफ्ना सैनिकलाई प्रेम तथा विवाह गर्न रोक लगाएका थिए । प्रेम र विवाहले सैनिक कमजोर हुन्छन् तथा युद्धसँग सम्बन्धित गोप्य सूचना बाहिर सार्वजनिक हुन्छ भन्ने धारणाले सम्राट क्लाउडियसले प्रेम तथा विवाहमा रोक लगाएका थिए। तर सम्राटको नियम मन नपराउनेमध्ये रोमनका पादरी सन्त भ्यालेन्टाइनले प्रेमको पक्षमा आवाज उठाए। उनले प्रतिबन्ध उल्लंघन गर्दै धेरै सैनिकको सार्वजनिक रुपमा विवाह गराए।
सम्राटले उनलाई पक्राउ गरी मृत्युदण्डको सजायँ सुनाएर जेलमा राखे । जेलमा रहँदा सन्त भ्यालेन्टाइनको जेलरकी दृष्टिविहीन छोरीसँग माया बस्यो। आफूलाई मृत्युदण्ड दिनुअघि सन्त भ्यालेन्टाइनले लभ फ्रम योर भ्यालेन्टाइन भन्ने हस्ताक्षरसहितको प्रेमपत्र आफ्नी प्रेमिका अर्थात जेलरकी छोरीलाई दिएको कथन छ। उनले आफ्ना दुवै आँखा प्रेमिकालाई दिएर मृत्युदण्ड स्वीकारेका थिए । उनलाई सन् २६९ को फेब्रुअरी १४ मा मृत्युदण्ड दिइएको थियो। सन्त भ्यालेन्टाइनले प्रेमका लागि गरेको त्यस त्यागको सम्झनामा विश्वभर हरेक वर्ष १४ फेब्रुअरीमा प्रेम दिवसको रुपमा भ्यालेन्टाइन डे मनाउन थालिएको हो ।
प्रकाशन मिति–२०७७ साल फागुन २ गते आइतवार ।